(作者簡介)李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。

  各位朋友,媽媽有無喺你睡前講過故事?有的話,聽過獨角獸未?這是西方神話,高貴、純潔的象徵,獨角獸額前有一隻角,還長出一對翅膀,為你帶出無限想像空間。

  瞓醒未?我想問(你長大成人了),你老婆有無經常講人哋老公嘅故事?有的話,聽過好男人未?這是獨角獸的親戚,同樣代表高貴、純潔,雖然沒有角,也沒有翼,不過,好多人話獨角獸與好男人同屬「聽過,但從無人見過」之地球生物。

  我無諗過做好男人,雖然你鍵入這三個字,馬上發現好多女人網都彈出「十個好男人的條件」、「如何吸引好男人」等等文章,說明好男人依然大受女人歡迎,甚麼「男人不壞,女人不愛」是經不起時代考驗。然而,好男人實際不存在,只是杜撰出來的,你教我點識做,扮我都唔會似。

  上一個世代,聽說香港曾經有過好男人,當年公認好男人是來自舊上海,上海男人有一半以上都是好男人,特點是有學識、斯文有禮、陰聲細氣、識講說話,兼且無脾氣。你知點解?原來上海好男人這樣練成的︰上海(老)婆十之十一係強勢,聲洪力足,氣場過人,上海男人遇上上海婆,必須被克制,久而久之,馴化成好男人。大家有印象周潤發、繆騫人主演的《傾城之戀》,金川飾演白流蘇的哥哥,就是經典的上海好男人,更抵死的是戲中這位四爺,帶有比梁朝偉更憂鬱的眼神。對於家中幾個惡女人對白流蘇的不友善,四爺只有啞忍,一腔抑壓情懷唯有用二胡哀鳴之聲宣泄。

  恕我老實講句,以上典型的好男人,今時今日畀你都唔好做,因為如此「鵪鶉」,你點可以喺香港地搵到食,粗茶淡飯都勉強啦,仲使旨意你有一億幾千萬元買層二千方呎嘅樓?無買二千方呎樓嘅本事,即係無能達到(香)港女(士)的「有樓有高潮」要求!各位觀眾,唔通你以為拉二胡可以令港女有高潮?是以,四爺之類好男人難以在香港生存,而上海男人的好男人傳統亦難以薪火相傳,所以我這一代人就只係聽過,但未見過好男人。

  順帶一提,金川是上世紀七十年代的英俊小生,當年二十歲的張艾嘉(曾改名張愛嘉)被他迷倒,他是她首任男友,據聞十八歲初出道的金燕玲也曾力追金川。這位電影中的好男人,其實與現實中想像的好男人很不同,反而更像獨角獸。神話中的獨角獸自由自在於山間野外,不過,獨角獸有一個罩門死穴,就是易受少女迷人的體香誘惑,一旦聞到,便「盲舂舂」走過去被對方據為己有。意大利畫家多梅尼基諾(Domenichino)十七世紀代表作《A Virgin with a Unicorn》就非常到位的把獨角獸遇上美少女的一幕,描繪出來。嗰隻獨角獸不是作「高大威猛」狀,而是一臉「冧到爆」的陶醉模樣。

  我想帶出另一個信息是,好男人與獨角獸除了是「聽過,但無人見過」之外,兩者同一特點都是「好容易被美少女誘惑」。好似好男人咁樣的男人多的是,你想現實生活裏,有一個坐懷不亂,永遠愛你一個,做你一輩子守護神的好男人,真係神話過媽媽細個o氹我瞓講嘅神話一樣。之不過,好男人係好有市場,而且好似瘟疫咁,驅之不散。近日香港又掀起一場好男人熱潮,我身邊的同事朋友上司,忽然之間,好在意自己形象,在毫無預告之下,個個扮晒好好先生、君子。

  最明顯係我老細,飲茶食飯之間,佢有意無意勸大家唔好再突出部門矛盾,應以公司業績為重。我聽得多,有些少頂唔順,想起瑞典人關心問候美國總統特朗普的名句︰「What has he been smoking?」(文雅的中譯為︰「佢食錯啲乜嘢?」)當然,我怎敢兜口兜面咁問佢老人家?只係諗極唔明,恐龍點會變成獨角獸?有同事收到料(經驗中收到的多數係流料),公司計畫換CEO喎,明啦。哦,明白晒。

  點解扮好男人可以咁得人鍾意?於是我又得從獨角獸的神話之中找線索。話說︰「獨角獸的角有神奇魔力。從角上挫下來的粉末可以解百毒,服下粉末即可抵禦疾病、百毒不侵,更能夠起死回生。」嘩,好似「寶藥黨」咁口吻的說明,令人幻想獨角獸能醫百病,一劑搞掂的曠世奇珍,於是,行走江湖者,如我老細之流,適當時扮獨角獸般的好男人,係高明選擇。

  有位入世未深的同事好傻好天真問我︰「扮好男人乜佢自己唔會笑咩?」我話,有心扮好男人一定有準備,講唔定老細晚晚睇俄國戲劇家康斯坦丁.斯坦尼斯拉夫斯基的《演員的自我修養》,以佢老人家之道行,又點會唔明「臨時演員都係演員」的道理?好似今日咁,我哋成班同事開會開到八點鐘,老細去完無謂雞尾酒會,打個白鴿轉返上Office,專登喺我哋面前出現,仲要表情十足講︰「你哋唔辛苦吖嘛,日日都做咁晏(指住新來的男女同事),阿仔阿女,快啲返屋企啦,Work life balance呀!」

  當時,我好想拍手掌,弊在手上有幾個File同埋揸住部手提電腦。康斯坦丁.斯坦尼斯拉夫斯基教大家,演戲的境界要求做到「通過有意識達到下意識,通過經意達到不經意」。老細,你係得嘅,你剛才入門口跟我們揮手,再到你企定定喺Office中央的一番慰問詞,全部一Take過,簡直有如行雲流水,點止「有意識地創造下意識」咁簡單。如此演技,周星馳、吳孟達也不外如是,我想為你的成就鼓掌,也對你日後的前途放心。

  老細,他日你上唔到位做CEO,不用灰心,以你練成的好男人演技,中午可以做《都市閒情》主持。仲未夠?放學時間做埋兒童節目,同細路仔講吓獨角獸神話,包你o氹到數以百萬計粉絲。一句話,好男人與獨角獸,係無得輸㗎!