特首選舉塵埃落定,候任特首林鄭月娥參選時曾經講過「上帝叫我參選」,今日竟以777票當選,唔少網民就議論紛紛,覺得唔通有天意?
對於777呢組數字,唔同人有唔同解讀。喺西方,7有代表完美嘅意思,因上帝用咗七日創造天地人;777又分別代表聖父、聖子、聖靈,成「三位一體」嘅上帝。現在林鄭得票咁啱又係777,令人嘖嘖出奇。
小妹WhatsApp嘅朋友圈子內,就有唔少人「些牙」另一個解讀方法。有人話諗起賭場嘅角子老虎機,要好幸運先拉到三個7字中Jackpot。更有人話,林鄭嘅得票令人諗起波音777客機,希望喺林鄭帶領下,香港可以振翼高飛咁話喎。不過,亦有人唔認同呢種解讀方法,反而覺得似粗口諧音喎,認為唔係咁「老黎」。點樣解讀,真係各取所需。