古仔與黑仔同時10月壽星。
古仔與黑仔同時10月壽星。

  (星島日報報道)馮志強執導電影《犯罪現場》前晚舉行首映禮,一眾演員古天樂(古仔)、宣萱、姜皓文(黑仔)及張繼聰等出席。適逢古仔和黑仔同為10月壽星,大會特別安排生日蛋糕為兩人賀壽。不過首映禮進行期間,有一名內地女子在場外不停向古仔揮手,又大聲自稱「古天樂老婆」,不過古仔在台上處變不驚。

  剛於10月21日度過49歲生日的古仔,被問到生日願望時,他表示是身體健康,因為有身體健康才可做其他事情,今年有跟朋友吃飯,正日生日與家人慶祝,反而未有跟粉絲聚會慶祝,因為擔心交通方面麻煩。身為好友的宣萱,笑言有送生日禮物畀古仔,相當適合對方,又爆自己會記得每個朋友生日,皆因會在記事簿記下,所以每次睇到便會傳訊息給朋友祝賀,朋友就會好開心。雖然古仔未有透露宣萱所送的是甚麼禮物,但他笑言好鍾意,自己也會記得對方生日。宣萱即說:「遲咗一日囉!記一世。」

  對於票房成績,古仔坦言有期望,雖然票房不能控制,但當然希望大家睇得開心。談到若跟宣萱再合作想演哪類型角色?古仔表示宣萱想演反派,但暫時未計畫好;宣萱則謂曾睇過美劇講及患有自閉症的醫生,如有機會演的話也想嘗試演這類角色。

  張繼聰透露為該片經常拍開槍戲,搞到好緊張瞓捩頸,又大讚多位前輩張家輝、古天樂同劉青雲揸槍好有型,日後自己有機會拍警匪片會加入槍會學揸槍。問到太太可有安慰他瞓捩頸?他笑言每次都會將傷勢誇大十倍,希望得到更多關心,兒子也會問及拍攝情況。他說:「等個仔大啲,都想帶他去拍攝現場,可以了解爸爸幾辛苦,同埋知道不同崗位,識得欣賞各行各業。」

  10月26日是黑仔53歲生日,他笑言跟古仔同是10月生日之星,不過每年自己生日與太太的生日及結婚周年紀念相近,所以會連續慶祝。問到可有送結婚周年及生日禮物給太太殷寧?他笑言所有錢都交給對方,所以會叫太太買喜歡的東西,而太太最後買了首飾。他說:「今年跟家人一齊吃飯慶祝,本來每年都是跟太太去旅行,但今年要開工,不過好開心工作時切蛋糕。」

這位自認「古天樂老婆」的粉絲在台下不停叫囂。
這位自認「古天樂老婆」的粉絲在台下不停叫囂。

古天樂與宣萱都希望新作可以有好票房。
古天樂與宣萱都希望新作可以有好票房。
監製爾冬陞偕戲中演員合照。
監製爾冬陞偕戲中演員合照。