(作者李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。)

  有一段戀情,其實與我十萬八千里遠,可是時刻被我記掛着,嘗試找一個合理解釋。為甚麼約翰連儂戀上小野洋子,投入到甘心把親生子朱利安摒諸家門之外?

  「安仔,連儂過世幾十年,你何解挖番起陳年愛情故事去講呢?乜John Lennon呢排喺香港好紅咩?」我唔係太懂張翁個爛Gag有何微言大義之處,我只係觸景生情,不說不快,不得不說而已。「乜嘢捉警?」大師兄,開學喇,唔該專業啲。「唔係噃,你自己開口夾着脷,將連儂拉埋捉警嚟講,問番你想點啫?」我唔知是否敏感,大師兄呢兩個月變咗好多,有時飲多杯我會忽然自問,呢個仲係咪我熟悉嘅大師兄,佢莫非近排吸得靈氣多?

  「安哥,你位大師兄放假去沖繩,無去過四川。」銀行偉,你仲未畀銀行炒咩?心情繼續良好,難得。「偉哥,周街平樓,大摩細摩驚你唔死,係咁出報告唱衰香港樓,講到樓價跌番五成。」

  張翁開威士忌招呼大家,幫銀行偉代答︰「經濟唔關我哋事。」明,即係話銀行偉呢十幾二十年已經喺中環搵夠,同你一樣,淨係收息、收租都食過世。「安仔,你都未答我,無端端講起阿John Lennon,有乜心事?」

  事情不由我不仰天長歎,連儂係我偶像,佢作嗰首《Imagine》,許我一個烏托邦,今時今日,我多謝佢都嚟得切,因為從此做人有咗醒覺,有咗信仰。幾十年,打份牛工,收最低工資都樂在其中,絕無學人躁底。「不過,張翁你知唔知,以一位出世之神級偶像,點解會癡迷一個咁嘅女人?」大家問,邊個女人,連儂好似有過好多女人,其中一個係美籍華人。「我梗係講小野洋子。」

  張翁第一個唔同意,因為小野洋子是日本富二代,又是有點名氣之當代藝術家。「連儂一生追求世界和平,倡議放棄財富,無宗教、無國界,吓哇,但你睇佢第二任老婆呀,搶人老公不特止,仲唔准佢個仔朱利安見個老竇,刻薄到每月批二百鎊做生活費,如此俗品巴辣,你話係當代藝術家,OK,唔同你拗,事關做藝術家唔使申請,你話自己係就得啦,但係小野洋子又點配做連儂夫人?」無人答我喎。

  唔經唔覺,朱利安已經五十六歲,連我都要叫佢聲大佬。最近,呢位連儂之子,大爆自己童年不幸生活,到頭來無分享過老竇留低之天文數字財產,全數由洋子吞晒。數下數下,朱利安控訴連儂當年係出軌,結果搞到拋妻棄子,佢一夜之間變單親兒子,盡失父愛。

  「係,真係幾慘,不過,好在披頭四有個保羅麥卡尼,呢位叔叔十四歲失去母親,好明白單親孩子之痛,加上朱利安係第一個『披二代』,所以保羅好錫佢,兩人關係親過父子。」張翁,我幾乎流眼淚,係見到朱利安接受訪問講嗰句︰「老竇掛住同洋子周圍去,我就好似無主孤魂無人理。」朱利安仲話︰「連儂是一個偽君子,他向全世界宣揚和平與愛,卻不肯分給妻兒一丁點的愛。我自己最不想成為的,就是像父親一樣的人。」

  喂,咁又唔得,我唔理約翰連儂真係幾無情無義,你係佢個仔,你姓連儂,一世姓連儂,你同你老竇仲成個餅印,你唔係想話你唔係連儂人?「你仲年輕,無乜人生經驗,你唔係太明朱利安個心點諗?」首先,多謝張翁曲線話我年輕,再者,好想請教前輩如何理解朱利安心情?

  連儂亦係好慘,生於一個破碎家庭,上一代關係複雜,自小由姨媽帶大。佢同親生母親有聯繫,母親更加給他買了人生第一支結他,可惜,喺佢未成名之前,就被車撞死,致令他性格孤僻,這位年輕爸爸當然唔多懂得傳達父愛。

  「保羅麥卡尼母親也是很早離世,不過,相比之下,保羅家庭比較完整,而個人性格亦早熟世故,見到朱利安被連儂拋棄之後,識得以同理心去呵護這位小朋友。」

  啊,明白,之不過,就算保羅叔叔對你咁好,仲幫你作咗隻經典金曲《Hey Jude》安慰你,你都無理由想擺脫你嘅命運同基因,唔做連儂個仔噃?保羅麥卡尼係你貴人,但你無可能變做朱利安麥卡尼。「Hey Jude, refrain. Don't carry the world upon your shoulders. For well you know that it's a fool.大師兄,呢幾句係咪好應景?」

  銀行偉懶好英文,幫我譯埋︰「Hey Jude,保持克制呀,唔好以為你揹得起全世界噃,你知唔知你係碌葛咁蠢。」偉哥,你好似加咗鹽、加咗醋,朱利安千錯萬錯都係因為自小失去父愛,沒有甚麼大不了的反叛。

  講開又講,保羅麥卡尼作《Hey Jude》,一半為朱利安,一半係自身有感而發。我曾經講過,保羅兄有位第二任女朋友,係才女兼演員,名Jane Asher(珍愛舍),雙方拍拖拍到散下散下,反反覆覆,好鬼煩。好多人以為「You have found her, now go and get her.」係直指︰「去啦,去同你個洋子一齊啦!」其實,保羅想咗好耐,要結束同阿珍之馬拉松戀愛。此時,佢心中已有目標,準備把心一橫,另投一段新戀情。約翰連儂鬼知佢拍檔咁多嘢咩,問係咪寫我呀?保羅窒佢一句︰「Sorry,你想多咗,唔係寫你。」

  成隊披頭四,除咗連儂本人之外,無人鍾意小野洋子,事關呢位阿姐真係好煩、好自大、好霸道,入咗披頭四裏面,馬上以為自己唔係阿嫂,係老闆娘,Paul、George and Ringo變咗夥計,洋子仲要安排自己同披頭四同台演出。阿姐,你乜料呀?唔使講,好哋哋隊披頭四好快散晒,更加可惜的是約翰同保羅鬧大交,無朋友做。

  「喂,安仔,飲多杯好過喺度棟篤笑啦,唔使你擔心,朱利安大個仔啦,你照顧自己,善待自己好過。」朱利安有過一啲啲父愛,你聽過《Lucy in the Sky with Diamonds》?連儂有一日見到朱利安畫公仔,即時靈感湧現,作咗呢首歌。嗱,錢就無,物輕情義重,送首歌畀你啦,呢個世界無乜幾多個咁幸運㗎!