(作者李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。)

  很遺憾,我今天不是超級富豪,也不是國際超級球星,更遺憾的是Victoria's Secret的Fashion Show冚旗了,從此天使跌落凡間,我若忽然當上超級人馬,已無法入場睇「維密秀」,一瞻超級模特兒風采。

  已經有二十幾年歷史,簡稱「維密秀」的時尚表演,將無以為繼,「維密」變成歷史遺物,影響的不止我一介升斗市民,而是整個「天使時代」,不要看輕一年一度由五十、六十位超級模特兒穿上性感內衣,盛妝上場的時尚秀威力,這裏包括了全球男與女的夢想,引發出一個媒體+時尚+話題的複合市場,市場價值之大,目前尚未見到有正式或權威的估值,總之就是數以十億、百億美元計,一旦停止,誇張的講句,地球也為之失色。

  大師兄良久不發一言,看似有心事又似心不在焉,近乎九唔搭八搭上一句︰「當年鄉下大學宿舍,七時過後都有內衣秀,你記得無?」大師兄,隔籬女生宿舍風光你點知呢?「安仔,你都有粉墨登場噃。」吓,你最近一定係畀街上互動場面嚇到思覺失調。「七時過後,你哋個個沖完涼,都係身穿秋蟬牌、利工民周圍走啦,仲唔係集體內衣Show?」

  我想補充一點背景資料,大師兄係一位保守的男孩,當年堅持四季穿全套睡衣在宿舍內活動,最憎我等貪方便,牛記笠記人士,想不到佢介意到依家,今日還要借勢抽水兼舊事重提。

  「你兩位鄉下朋友唔好顧住啲私人恩怨,講番Victoria's Secret啦。」你唔怕畀人誤解你為老不尊,張翁,我無所謂,雖然我不是「維密」消費者,但作為一直有監察其活動的權益人士,我有說不完的話題。

  不得不提,「維密」近年令中國人吐氣揚眉,皆因捧起了一個劉雯,二〇〇九年她成為首位登上「維密秀」的中國超模,大國地位終於被時尚界確認崛起,比起中國跳水女選手又双叒叕在國際大賽奪得冠軍,來得更令國民振奮。劉雯蟬聯十年維密天使,更加在最後上海那個主場Show插上翅膀,還要事前取得免試資格,這份榮譽又豈是公開試攞十A,考到牛劍佛大學之學霸才女可以企及的呢?是以劉雯比電影明星還要紅,還要有更多Fans,當我們等待第二個劉雯繼續這個神話時,維密便已登仙界,你說怎麼辦?

  「安仔,甚麼維密Show,大灣區都有過不少山寨維密演出。美國不行,中國人自己辦得啦。」大師兄,咁嘅嘢你都講得出、諗得到,真係要叫多聲你做大師兄啦。問題並非神州無超模,亦唔係怕請唔到外國友人參加,而是知識產權問題,乜都山寨,咁大個中國無啲創意。

  「做乜鬧你師兄,好閒啫,改過個名,你叫天使,我叫仙子囉,你名維多利亞,我可以名香格里拉,要有中國特色就可以改穿中國式內衣,主題係肚兜又得唔得先?」關於肚兜,我知道係中國精深博大之民俗文化,推斷張翁之年紀,佢必然係上世紀七十年代大導演李翰祥之影迷,所以諗都唔使諗就為山寨維密諗到呢個特色主題。

  「你咁好橋又有水,喺內地又有人脈,不如你去搞啦,香格里拉仙子秀,幾好呀。」我敬在座各位一杯,然後直豎拇指,畀個Like張翁,大家笑得好開心,好似真嘅一樣。點知最遲入嚟呢個中環黃昏酒聚之銀行偉,未坐定就加把口︰「使乜咁轉折,內地人咁多錢,成個Victoria's Secret收購過來,咪兩全其美。」恕我讀得書少,邊兩個美呢?「辰哥,滿足內地同胞虛榮心之餘,又可以作為對特朗普拋出善意。」

  係噃,阿爺可以同美國貿易代表講︰「中國暫停買美國農產品,係因為基於內地需求決定,並非針對特朗普,嗱,幫你收購Victoria's Secret,有無得諗?」我好相信今時今日,錢唔係問題,反正美國又帶頭印銀紙,阿爺唔會買美債咁老襯啦,梗係買實物。以後Victoria's Secret搬嚟內地,Made in China,跟手再搞番Victoria's Secret Fashion Show,堂堂正正,掂呀。

  「你想得美,你有無理過美國人感受,美國好多嘢唔係你Chinese有錢我就賣畀你。」大師兄,又唔係收購美國銀行,更加與軍事技術無關,幫你買性感內衣都唔得?美國係實用主義行先,無理由有錢唔賺,更何況呢個維多利亞五行欠水,已經唔係秘密。阿爺揼水救番維密,一顯救世主風範,想下都令人飄飄然。

  講番關於我對維密之遺憾,我入到場睇「維密秀」又如何?就算介紹啲Angel畀我識,我都唔敢行埋去。並不是我怕咗維密天使之翅膀,而係所有Victoria's Secret Angel身高起碼一七五公分,加對十公分高跟鞋,問我如何高攀?「辰哥,你當自己係曾志偉咪得囉。」偉哥,你高得過我好多咩,你毋須講到咁白。

  老實講,如果阿爺咁爭氣,買咗Victoria's Secret,就要認真改革一下。第一,身高一七五公分唔係模特兒普世標準,你唔好話要咁高先至可以壓得住個T台,汪阿姐有幾高,你睇佢壓唔壓得起個場?所以唔好再畀西方標準左右大家之價值觀。第二,唔係話劉雯姐姐唔夠靚,佢實在同個靚字無任何關係,我其實想說的是中國人心目中個靚字,應該唔係咁寫,你可以話劉小姐好型,OK我接受,不過要搞中國Victoria's Secret,我建議要以東方美為準則,就算洋人都要有東方美先至考慮畀你面試。

  「辰哥,唔好意思打斷你,洋人又會有東方美,唔好玩啦,你估玩Photo App,抑或PS?」我唔同意,你可能少睇英語長片,你識得邊個叫珍妮花鍾絲?佢有部經典愛情片叫做《生死戀》,你上網望下花姐當年劇照,化咗個妝,穿起旗袍,七成白燕咁樣。

  「安仔,你真係識貨,呢部電影是我至愛,大家未睇過《生死戀》,但一定聽過主題曲《Love is a Many Splendored Thing》。」但見張翁一臉陶醉,你估你真係去咗景賢里,抑或深水灣?好嘞,喺你未借幾分酒意,開口唱此名曲之前,我要提早告退,因為再夜啲,個天就無咁多星星畀我數嘞,Good Night!