(星島日報報道)容祖兒前晚舉行第14晚「Pretty Crazy」紅館演唱會,臨放假前夕,祖兒高興「賣大包」,不但換上多套新衫,更連邀兩組嘉賓,先有組合農夫上台大爆笑料,其後祖兒的鄰居張智霖(Chilam)也突然出場,打孖送驚喜給觀眾。

  前晚祖兒登上親自命名「紅磡360」的高空纜車與歌迷齊唱K,又再捕獲坐在「山頂」的胞弟容逸恆,兩姊弟開心對唱。在台下人群中,竟見「農夫」的陸永和C君,祖兒邀兩人上台,兩人一上台就「笑彈」放題,先踢爆:「扮咩驚喜,大家一早知我哋係今晚嘉賓,好多人收到嘉賓list,你哋都知下場係草蜢,睇到18號係農夫,幾嬲!」笑到祖兒和觀眾停不了,全場尖叫鼓掌。

  陸永問到:「搵我哋先夠crazy係咪?之前全部巨星,原來容祖兒真係黐線!」C君則謂:「我作為嘉賓要同全場觀眾負責,想講對唔住好抱歉,之前睇張學友、劉德華、古天樂,今晚係農夫?如果在座任何朋友想退飛,唔需要唔好意思,我自己都退,你朋友問你睇嗰晚係邊個嘉賓,人哋話張學友,你話農夫,幾難聽,兩個垃圾!」陸永加把口:「唔好怪Joey,佢係我認識最錫歌迷嘅歌手,錫嘅程度crazy到假期唔要都補場畀你哋,今晚係咪要補?咁嘅嘉賓衰成咁梗係要補啦!」觀眾笑到起哄。

  農夫落台後,祖兒開心提到翌日就放假,是晚決定賣大包,然後唱出自己喜愛的「別人的歌」《祝君好》。原唱者Chilam突然升上台合唱,觀眾驚喜大叫,祖兒笑言要請大家食多粒糖,並爆二人其實是同居關係,因為住同座大廈,常在停車場、電梯遇見。Chilam也大爆小秘密:「我個仔好怕醜等你出咗電梯就問我『Who is she?』,我答『She is a diva,香港天后!』」兩人又合唱《歲月如歌》,並跟觀眾握手。前晚捧場嘉賓包括袁詠儀、余安安、楊小娟、許廷鏗、胡鴻鈞、劉佩玥、周志文等。