(作者李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。)

  好唔開心,近排天氣谷埋谷埋,不時作打風,仲有失驚無神落大雨,真係幾難受。成日鬱住鬱住。」係?大師兄,憂鬱非你本性,我唔知你有情緒𠻹,不過,我肯定你唔知我心事,事關我收到的不幸消息,但同本土天氣無關。

  「安仔,唔好消息接二連三,日日新鮮,當然,我係講投資市場,但好有興趣想知你這個『麻木不仁』之高人,有何事憂愁?」銀行偉,你留學美國並非中文水平低的藉口,我個人係「灑脫高逸」,即係唔會學人「多愁善感」。「麻木不仁」是指人思想遲鈍、對事漠不關心之貶詞,係負面形容,等如我想話你係「投資專家」,點知用錯「財經演員」呢個Term,明未,老友?

  「唔使咁執着嘅,銀行偉係番鬼仔性格。」張翁,你老人家的確包容世侄,識着你三生有幸。唉,不幸的是,「大家有無留意韓娛?」吓,你哋唔知韓娛即係韓國娛樂新聞,咁你叫我如何告訴你「雙宋戀」離婚收場,宋大美人沒有人同情維護,還要身陷是非,這宗人間悲劇?宋大美人係韓國國寶,係好多男人心目中之理想情人,當日她跟阿Rain合演《浪漫滿屋》,令我方知世界上原來有那麼的一個韓國童話,有那麼的一對韓國金童玉女,自此之後,我拋開對韓國向聯合國申請端午節為韓國歷史遺產、韓國男足必勝中國國家隊之芥蒂,全面擁戴韓流、韓娛,發夢嗰陣,還不時夢見自己係韓國人。

  「辰哥,原來你咁浪漫,須知道,浪漫的結局通常不浪漫,宋大美人同另一宋相戀,當韓娛睇,OK,好有幻想空間,不過,一個少女不再的大美人,譜一曲大齡差距的姊弟戀,並不容易,更何況對方名氣可能在你之上。」偉哥,你轉咗行做「城市情人」?咁多有深度又有感情之分析,莫非想撈埋夜晚個電台節目?

  講開分手離婚,我國冰冰大美人也宣布與未婚夫甩拖,唉,不幸的消息何其多,好似又係姊弟戀噃?張翁,你人生經驗豐富,又點睇呢單Case?「安仔,唔好將人家之不幸當作你自己憂愁。」對嘞,「亦唔好預知你自己未來而變成焦慮。」各位,睇娛樂新聞正正是用來達成以上兩個目的,唔係乜嘢叫八卦呢?八下人哋閒事,知下別人私隱,代入幻想自己墮入相同處境,乃係高尚情操之修煉。人係感情動物,連娛樂新聞亦不懂欣賞、不懂品味,咁就真係「麻木不仁」嘞。

  「冰冰大美人近期已經好低調,好少見伊人行紅地毯,又好少見佢着名牌,係嘞,冰冰姐有乜事幹發生呀?」偉哥,你唔追開陸娛就唔好問咁多,你要我幫你解釋,怕會阻住大家飲酒談天。「一句話,冰冰姐有中年危機,而危機終於接二連三爆發,希望佢大步檻過。」冰冰姐你要撐住,你係昔日中國最紅代言人,行到逆境時唞唞啦,過多若干年,你到五十歲咪出寫真集囉,我話過買兩本捧你場。

  「辰哥,你屋企收埋好多寫真集?」當然啦,有好多本,最珍藏係比堅尼嗰款。「係噃,安仔,你喺鄉下讀大學都有買日本寫真集,呢種愛好,都算係高尚情操。」大師兄,你都有借嚟睇啦。「你話高尚情操,我受得起,因為本人所買的都是山口百惠寫真集。」張翁第一個反應係,「山口百惠先至係現代童話,佢老公三浦友和同佢襯到絕,當年比起雙宋戀不知轟動幾多倍。」話又不是這麼說,山口三浦戀與雙宋戀比,就好似蘋果同橙比,基本上並無比較意義,之不過,山口百惠係人間極品,後生有幾靚就有幾靚,結咗婚有幾賢慧就有幾賢慧。「係呀,老咗有幾師奶就有幾師奶,師奶到你認唔出。」偉哥,人梗係會老,但係山口女神無論老咗、師奶咗,都恰如其分,發自內心,呢啲咪叫做撇脫囉。

  我講到興起,自動揸杯酒坐頭位,好似新聞發布會咁侃侃而談︰「天王女星有幾多個好似山口女神,一話退出,嫁給愛情,獻身家庭,就係咁堅持放下所有昔日光環,神隱於市,偶然買餸畀你影到個師奶樣。她來自基層,不因一夜富貴虛榮,而以為自己Upgrade咗,從此再做唔番自己。」我望下張翁同大師兄,佢兩個似有同感,銀行偉則行咗去唔知邊度,可能佢識之日本女藝人,唔係山口百惠嗰個組別啩。

  「安仔,你好似想講,大美人、大明星同另一半夾唔埋,同自己放唔低身分有關?」大師兄,我又唔係「另一宋」,又唔係山口老公,邊知咁多嘢噃!之不過,我記得有位香港大美人大明星,拍拖、結婚好多次,結果依家單身一個人,我不知她愛情路為何崎嶇,我只是從一單娛樂新聞,大概推測到佢有何性格上之缺點。「某年某月,這位香港大美人大明星,在外國開始吃得開,加上伊人英文了得,久而久之,竟然自我『升呢』,對當年熱烈報道佢新聞之本地娛記,不瞅不睬,但係見到番文傳媒,就搬出一個合作愉快模樣。」你唔知我講邊個咩?

  「安仔,我有印象,後來本地娛記要守候機場,望佢停低大家問幾句,娛記無奢望同佢做專訪,點知呢位以為自己變咗外國明星之人,直行直過,娛記發揮香港精神,窮追不捨。」追得幾追,呢位大美人大明星忽然停低,瞪大眼,大聲鬧︰「好咯噃,你知唔知我係XXX,我XXX費事同你講。」其實大美人大明星發下脾氣好正常,話唔定係佢有心「放水」畀娛記,即場報道佢鬧人係好Juice之新聞,娛記可以返去慢慢作,例如話大美人大明星失戀躁狂又得,拍完套戲上咗身更得,大家有貨交啦。然而,旁觀者看呢位大姐咁自我,佢點做人老婆、點做情人?如是者,戀愛與婚姻接連失敗,不足為奇也。

  講番啲開心嘢,姊弟戀之芬姐四十有五生第三胎,家庭基礎穩固,祝你好事成雙,生雙胞胎!