(作者李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。)

  這是一個沒有太多好消息的六月。我未把說話說完,身邊的八十後同事C君就插嘴︰「咪係囉,因為有冤情吖嘛。」我有點不悅,閣下逢星期一遲到,星期三早走,如此有原則與個性之員工,公司的半年度花紅無你分,有乜冤、有乜怨?

  「我就話,六月有愛情。」原來係我的好同事,魯凱先,老闆分你幾多花紅呀,咁風騷?「安仔、C君,有乜好拗,擺明呢個六月Sweet、Sweet,你兩個就係要清泉濯足,搞唔妥,搞唔黑,你哋就周身唔安樂。」自稱有冤情之C君,比我更加不悅,「六月六日斷腸時,有愛情咩?喺邊度?唔多覺噃。」係囉,咪以為你係Old Seafood我就唔敢「抦」你,口輕輕,好嚴重㗎。

  「兩位大佬,你哋無睇網聞?台灣第一美人林志玲閃婚,下嫁日本有八塊腹肌之型男Akira,佢老公又唔係富豪,仲要細佢七年,天下竟有如此美滿的愛情故事,你兩個包拗頸,能不動容,真係教人遺憾。」哦,原來魯凱先講志玲姊姊大婚之喜,容我都叫伊人一聲姊姊。「無所謂啦,六十二歲嗰位蔡英文都係叫佢志玲姊姊。」利益申報︰志玲姊姊係我偶像。

  「辰哥,乜你都有娛樂偶像?我以為你無 。」哥哥仔,你咪以為自己有好高強之判斷力先得㗎,我有偶像,我有信念,唔會好似你咁膚淺,黐喺Partition上面,變頭像圖案擺上社交平台。之不過,志玲姊姊並非我的娛樂偶像,而係偶像,她是一個人物,一個代表現代女性的人物,她的智慧與情商(EQ)成為我的學習榜樣。

  「C君,你點睇林志玲?」這位八十後真係開口夾着脷,佢話︰「雖則佢老公並非老屹屹之銅臭有錢人,仲係姊弟聯婚,幸運幾乎向林小姐傾斜,之不過,嗰位日本姑爺,好似年輕時之王青,又似Lionel Richie。」講開又幾似,今次輪到魯凱先不悅,「你咪咁無禮貌形容人老公啦。其實,客觀啲講,大家話林志玲係台灣美人,是有點過譽,你話佢係台灣第一夢中情人更恰當。」

  甚麼叫做夢中情人?即係你好鍾意佢,好掛住佢,好想成日見到佢,之不過,你唔會,亦唔敢娶佢,是以林志玲成功作為國際名牌的寵兒,在大中華搞活動,幾乎無佢不成事,只有夢中情人先有如此條件。假如志玲姊姊是一個討人喜愛,令人有衝動想娶番一個如此老婆的話,國際名牌不會找她代言,超級市場周五周六大減價廣告就有得你賣。

  「魯先生,你分析得好深入、好貼切,之不過,Tea Time時間有限,唔該你講重點,林小姐做咗阿太之後,仲有無名牌可代言、仲係咪台灣第一夢中情人?」後生仔連吹水都咁「均真」,說話如此直接,怪唔得知社會愈來愈理性。「C君,娶咗就唔會係夢中情人啦,你唔覺得咁係有犯罪感咩?呢鋪最遺憾係新郎不是言承旭,係就昇華變成大中華第一童話故事,林志玲馬上『升呢』,變成教主級人馬。」  

  我正在略有所思,不過C君已經「叉輪慈」魯凱先,「即係林小姐係咁先啦,明日黃花,有乜好討論?」我兜番住,「唔係嘅,志玲姊姊嫁得出、趕得切,明年可以轉賣奶粉廣告。」殊不知,又畀哥哥仔窒番轉頭,「奶粉廣告,邊種先?中年加鈣奶粉,唔使等結咗婚啦,林小姐十年前都有資格代言噃。」

  我同魯凱先交換一個眼神,一齊行出門口,費事理呢位燥底同事。「安仔,一個女人做到咁本事,唔簡單,你睇,所有負面新聞都發生過喺佢身上,成名之後,兩岸三地日日用放大鏡睇到實,不過,林志玲幾時都笑咪咪,得天獨厚之雞仔聲永不走音,那份從容、那份自若,相信係令你視為偶像的原因,吓哇?」對,志玲拍戲不是演技派,跳舞不是專業水平,連做節目主持都好勉強,再者,容貌非大美人之級數,但硬係佢行出嚟,佢就係C位,其他企C位者,都被她搶了鏡。當志玲姊姊站正C位,嘩,佢企之方向簡直有如出現北極光咁誇張。呢種無才無藝,又無可抗拒之魅力,應該出自個人獨特之品質,沒有半點添加,是以我估計志玲姊姊人品很好,換上是男士,「他」可能是那種「手中無劍,心中有劍」的高人。

  柯德莉夏萍也是魅力型夢中情人,之不過,她演技具舞台劇風格,很有爆炸性,一言不合,可以演出《金枝玉葉》的驚天水準,把羅馬一下子變成世界旅遊焦點,還有讓《珠光寶氣》成為時代經典,令蒂梵尼成為夢幻品牌。

  夏萍姨姨是名副其實的奧斯卡影后,志玲姊姊是素人,即是甚麼也不是,但十幾年來是十幾億人口世界焦點,這一點又似乎超過了夏萍姨姨,更何況,志玲姊姊是中國台灣人,親切感更大。

  志玲姊姊的光芒太大了,香港一時之間,還未出現有一位可與之同級較量的人物,所謂乜乜BB、物物BB也不外是三日鮮,好快無料到。「安仔,你知點解嗎?」我唔知,不過估計與香港BB的「公主化」有關,公主當然不同美人、不同情人,是以任何城中名女子,皆注重本身門第、本身學歷,說到底,香港BB已經轉型為Blue Blood為本。

  志玲姊姊沒有甚麼可炫耀本錢,有的話,據說都是後天加工(你懂的!),更遑論Blue Blood,從草根一路競爭上來,你說這條路幾艱難,你問,志玲姊姊有甚麼擅長?她最叻是扮嗲,最叻是擺硬照。夠啦,一動一靜都齊,本領不用太多,恰恰好為之最好。

  「安仔,你有乜嘢想寄語你的偶像林志玲?」多謝,魯凱先,我想趁機會講兩句︰「志玲姊姊,期望你婚後努力寫自傳,把你獨步天下的魅力模式,傳授給兩岸三地的後輩,培養新一代的夢中情人,這是急切的,因為你退出之後,好多男士已經瞓唔着。」