欣然接觸到這本跟我志同道合的漫畫書,我自小就有心願當漫畫家,可惜因為懶,從此只能靠作文傳情達意。

  作者肥蛋,據稱是九十後女生,Who Cares?在漫畫背後誰是誰不重要,最緊要大家「啱傾」,好像我很Buy她說︰「可以唔郁就唔郁!」我很懶,懶到沒有時間歸納、綜合我的懶,成為一門哲學。

  我只知自己本來是聰明伶俐、活潑勤奮的小朋友,可是天不該、地不該,我媽媽無端端領來一隻叫做「肥妹」的懶貓,牠真人(貓)示範甚麼叫做「可以唔郁就唔郁」,一旦霸住沙發的C位,你想「剷」牠起身都難。記得有個很煩的鄰居話︰「你隻肥妹好招積㗎,我係咁喵喵叫佢都唔睬,我仲想請佢食蝦米。」阿嬸,你慳啲啦,除非你擺粒蝦米入牠口,否則牠是不會吃的。肥妹和我身體力行了「可以唔郁就唔郁」。

  回到學校,我發現大家同樣懶郁,上體育堂最犯眾憎之事,莫如大腳踢走個波,踢過了隔籬場,大哥,你想搵邊個跑去執呢?不如大家「側側膊唔多覺」,你看體育阿Sir講完一輪「耶穌」(我讀的是教會學校)後,就叫大家踢波,自己留守在樹蔭下養神,一直未郁過。落堂後,等阿Sir執吧。

  殊不知,落堂之前,被阿Sir發現了,亂指一番說︰「邊個邊個,你去執番個波返嚟!」吓,乜點中我?我想向阿Sir解釋,根本無踢過波。他說:「咪係,你成堂郁都未郁過,快啲跑下步走去執番嚟,唔係就『肥』你。」阿Sir即時「兇」我,要我體育科「肥佬」!唉,算啦,雖然阿Sir明顯違規,又沒有跟學校指引,不過我要追究的話,真的很麻煩。

  首先我要將件事一五一十講給阿媽知,阿媽等阿爸放工,食飯之前跟他商量,阿爸阿媽即時拿不定主意,一定會周圍打電話問親戚朋友意見。晚飯時間推遲一小時,在這一小時內,我只有搵「肥妹」一齊窩在沙發上,「郁都唔郁」。等到爸媽有決定就大件事了,我可能要去見訓導主任、去見副校長,同體育阿Sir講多幾次「耶穌」……

  你話我應該點算好?未諗完已經執番個波,落堂,就係咁簡單。於是我進一步相信「可以唔郁就唔郁」是做人處世的道理。

  作者一如我般天馬行空,說她的懶人軼事,一邊畫一邊寫,真是有說不出的寫意,令我很羨慕。我很同意她說︰「努力唔保證成功,懶惰一定輕輕鬆鬆!」話咁快又過了父親節。爸爸不是我偶像,因為他辛苦勞碌工作四十多年,盡心盡力打好份工,永無告過半天無病的病假,有病都照返工,但升職加薪好少有他份。他之所以失敗,我猜測的原因是他努力工作。

  記得媽媽話︰「你老竇話唔聽,成世人返工梗係要早半個鐘頭,做乜啫,又唔係可以早半個鐘頭走,你唔好學佢。」當然,我奉行「可以唔郁就唔郁」紀律,直至鬧鐘第三次響為止。你就好啦,肥妹,不用上學!肥妹沒有反應,見我起身,知道有早餐吃,才起身跟我一起出房門。都好難怪,成晚沒有吃東西,再唔郁,就真的是「唔使郁」,餓都餓死你。

  作者好無厘頭說︰「要趁年輕,突破自己,離開Comfort Zone。」做人做到周身不舒服,那投胎來為乜?日日不是早半個鐘頭出門口返工、返學,就是日日趕返屋企做功課,Hea下也不可。我記得有一天,我一個人在房內,拉開衣櫃底個大抽屜,放進一個枕頭,剛剛好夠我一個人打橫瞓,享受郁都唔郁的下午,無人搵我,無人叫我,定格於一個無憂無燥的空間,這是難忘的幸福時光!

  作者列舉專職懶人表現之一,女生可以三日不洗頭!三日不洗頭好,定一日洗三次頭好?想想你都有答案啦。

  最後,我想分享瞓到自然醒的經驗。作者話︰「人生夢想是你日日瞓到自然醒!」其實日日瞓到自然醒的不是我,而是肥妹,或者更正確的說,這懶貓是日日瞓到牠鍾意幾時醒就幾時醒,有時醒了也不一定是醒。

  至於我,瞓到自然醒的經驗主要來自搭港鐵搵到位坐,一瞓之下,再自然醒來之際,發覺已經過了幾個站,好想馬上起身轉車,但一想起「可以唔郁就唔郁」,我不如瞓到總站再算。

  懶人就是這樣。

  懶不代表浪費人生,懶是一種高尚之人生態度,不是懶人不會明。算啦,下周自然見。