(作者李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。)

  英國是一個很奇怪的國家,就是英國人太幽默了,不過又能屈能伸,與他們打交道,最緊要輸人不輸陣,就好似「金毛獅王」特朗普就對了。

  英國是一個很愛面子的國家,幾年前,尊敬的英女皇用了一個巧妙的方式,與官員交談,「悄悄」說國家主席習近平閒話,說我們的領導人訪英期間,表現「非常粗魯」,而英女皇剛好就在電視台記者身旁,於是這番不應公開的說話,就變成新聞,很自然會傳到習大大那邊去,看,英國人的IQ、EQ高到「無朋友」。

  「安仔,乜你咁小器,N年前嘅事就抹咗佢啦,習大大都無投訴,你又何必記到依家,話晒女皇都做過我哋事頭婆,你今日讀飽書,讀書又唔使太花費,都係同殖民地教育普及有關,吓哇,大師兄,你教下安仔啦。」

  這是一個大假中的星期五,飲酒特別開心,我無講事頭婆閒話,我亦一向贊同「得人恩典千年記,得人花戴萬年香」的中國人主張,之不過,我是看不過眼那位「金毛獅王」又來大鬧大英帝國,站在女皇面前,不哈腰、不鞠躬,又無單膝跪,好似當自己大王,真係「是可忍,孰不可忍」。

  「喂,辰哥,使唔使講埋『勿謂言之不預也』,英美係大國,是結盟兄弟,又點同其他國家之關係?」明白,英國係百年前世界一哥,美國係目前世界一哥,大家惺惺相惜,不過,美國對前輩應該低調些少,好似上一手美國總統奧巴馬就識做得多,去見女皇有如學生見校長,於是贏得世界一致稱讚。

  特朗普今次環遊世界,據聞周圍拉幫結黨,針對中國,張翁,你有咩意見?「講呢啲,全世界都睇唔慣中國唔賣山寨手機,賣5G手機啦。」點解呢?又唔見有美國出到5G手機,你想全世界等埋你咩!「安仔,你仲細個呀?你都識講呢位總統係金毛獅王,獅子王梗係只有我威,無得過你威,明未?」

  我問銀行偉,中美貿易戰點睇,佢唔答不特止,仲要窒我,「辰哥,你話自己唔炒股,問嚟做乜?」大哥,日日見到財經新聞都講中美貿易戰,我想知幾時連呢單事件,都好似「心安」事件咁,淡出大家眼球之外,因為你唔悶,我都頂唔順。

  「辰哥,你一定會好失望,因為中美要拗手瓜,呢個過程好長,打完貿易戰,打科技戰,再打金融戰……」唔好講咁多,你咁叻,你話過我知,邊個會打贏?大師兄搶答︰「一定係英國贏。」你有無搞錯,中美貿易戰開打,又關呢個日不落國乜事?「好簡單,中美貿易戰打到各自內傷,大家唔順再打多場航空母艦戰,於是乎,美國變番紅番區,中國變番大清帝國,英國就好大機會替大家收拾殘局,好容易趁機再變日不落國。」

  哦,有此一天,大師兄你話香港會唔會掛番英女皇張相呢?「呢個世界乜都有可能,英國人最有耐性,你知唔知名相邱吉爾當年面對德國這位強手,佢對各國代表話大英帝國一定贏硬。」係咩?我唔在場,無聽過。「各國代表好奇怪英國有乜把炮,事關德國真係好打得,英國就英雄遲暮,點知邱吉爾帶大家去游泳池邊。」大家換衫游水?非也。邱吉爾取出一隻英式下午茶專用之茶匙,然後同大家講︰「德國係泳池,英國係茶匙,今日我茶匙在手,所以德國必敗。」這位偉大的首相馬上彎低身,用茶匙逐匙逐匙將泳池水撇出來。

  哈哈,大師兄你講冷笑話呀,呢個係英國版「愚公移山」?「對,點知真係畀邱吉爾望到呢一日,真係唔到你唔信。」我信,英國人好有耐性,又有智慧,所以乜人睇唔上眼,兜踎唔緊要,最緊要保持身段,英國人猛話人家無禮,不懂英式禮儀,好明顯帝國氣質無因為自己環境而有變。學下人啦,我講「金毛獅王」,咪以為你可以也文也武。

  講起習大大,好快有機會同「金毛獅王」會面,究竟中美之間有無修補關係可能,大家做番夫妻?張翁飲到差不多,講到夫妻,岔咗去第二度,同大家分享夫妻之道。「夫妻關係其實係一種經濟關係,大家好理性、好平等,除非有外來大衝擊,比如張愛玲筆下的《傾城之戀》,男女之間會有激情同霎時之所謂愛情。」我望下大師兄,佢好似全神貫注,又好似略有感慨,咦,唔通……

  中美關係曾經火熱,的確與當年金融海嘯這個特大衝擊有關,所以有美國經濟學家主動拋出Chimerica呢個咁肉麻 Terms,當時大家唔想死,就逼住「共同體」,依家平安無事,當然就會出事。係噃,張夫人好本事,識炒股炒樓,又識得管理,張翁發達,她有一半功勞都唔止,但她點解去咗加拿大住嘅?都係唔好多事,收番唔好問。

  「安仔,話明夫妻即係有莊閒,女人幾叻,都要畀男人威,你太超過,一定無好結果。男人有耐心照顧公主病患者,但係好難同女王相處,你明唔明?」明,我梗係明,唔係嘅話,大英帝國女皇皇夫愛丁堡公爵心口何來那麼多勳章,你估皇夫靠打仗攞番嚟?一定係表揚佢喺好多個十年,年年同女皇相安無事,全世界有幾多個男人有皇夫咁勁,佢唔攞諾貝爾和平獎,相信是世界一大憾事。

  究竟中美共同體,邊個係夫,邊個係妻?我都仲未搞清楚。「安仔,Good Question,就係當日大家無講清楚,所以咪累事囉,依家先至嚟拗,搞到拆天。」原來如此,夫妻可以咁都得,真係百歲唔死都有新聞。不過,大家可以主張無性婚姻,即係無夫無妻、無莊無閒,但又係夫妻,咁得唔得?

  「唔知你噏乜,安仔,你要知道夫妻之道在於平衡,你咁把炮,大家無彎轉。」張翁,放低啦,同你飲番杯,順補祝端午節快樂。