(作者李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。)

  新春佳節,放得假太多反而更加悶,睇戲行街,不如同一班好友吹水賀年,於是乎今天好熱鬧。

  除了我一人穿紅色外衣,到場相聚者身上沒有節日氣氛,反而這班年紀一大把朋友,刻意作時尚休閒打扮,我就變成萬綠叢中一點紅。張翁當大家係世侄,一人一封利是,還帶來半打「見得人」的紅酒,見到大師兄問︰「今年你有無犯太歲呀,你係咪豬仔吖?」有乜所謂,我生肖最獨特,今年哪個生肖好,我就屬嗰個生肖,豬唔好咩?豬仔好紅,我視線落在隔籬枱那位洋人中佬身上,壯健的體魄令人羨慕,如此天氣下,一件短袖T恤,焦點係心口之Peppa豬圖案。

  銀行偉大大聲話︰「佢攞咗孫仔件衫嚟着?」我望一望洋人,發覺其眼神有反應。弊嘞,偉哥,你日日同銀行界人士接觸,全程「英文台」頻道,不過,你無理由唔知,好多洋人廣東話好過你。「喂,我讚佢後生時尚啫,又唔係話佢似二師兄。」唉,乜今日都係赤口?

  我趁勢換一個話題,聽坊間一眾師傅講,今年豬犯太歲,主心情不好,但係同運氣無關,兜來兜去,都係一句︰有好有唔好,但係Peppa豬就有運行。「安仔,Peppa豬係豬,邊個同你講成班粉紅豬都係屬豬?」我又見到那位Peppa豬洋人用眼尾掃過嚟,大佬,我無講你,唔通你真係Peppa豬?

  點解我話Peppa豬有運行?話說內地過年之前,網上有一段短片成為全國話題,主題同Peppa豬有關。大師兄搶答係《啥是佩奇》,這是賀歲電影《小豬佩奇過大年》的五分鐘介紹片,演員都是「素人」,不過完全專業到位,亦拍得好有水準。張翁話,今年有邊個可以挑戰星爺?仲要係Peppa豬,呢隻豬乜唔係畀內地機關封殺咩?

  各位朋友,依家全世界封殺到性起的不是中國,我們最多都係認第三、第四,邊夠美國咁勁,一唔順眼就話封,又話要拉,繼而去拉去鎖。我見到銀行偉想出聲,我馬上來個封殺︰「得,知你想講,點解人哋要封殺你?你自己有無諗過原因吖,吓哇?」梗係你嘅錯啦,我講緊嗰隻好陰功之Peppa豬。

  原本Peppa豬係一隻好可愛、好正經嘅豬,應該好似我本人咁,年年都係好嘅一年,不但唔會犯太歲,仲係畀人(原創英國人)捧成國寶,點解?Peppa豬係英國創意工業成型以來,又一風靡全球之原創角色,好似哈利波特咁紅,人家用Peppa豬做學前教育娛樂,用意良好,健康又醒目,仲可以賺外匯。

  我反過來問銀行偉︰「你知唔知點解好哋哋會被內地禁止在社交媒體傳播?」見佢還未答得上嘴,我再施予連環封殺,一口氣話︰「Peppa豬就係畀香港人累死?」即場無人出聲,連洋人都再無望過嚟,坐到正一正扮專心飲酒。

  大師兄問,係咪張翁啲紅酒好「啃」,你咁快就上頭啦,Peppa豬關香港人乜事?你有所不知,Peppa豬一傳入中國就紅,點知紅得太厲害,隻豬又確實好可愛,於是一班毫無創意之內地網民,就利用Peppa豬惡搞。銀行偉即時截停我,「唔好惡搞前,惡搞後,請用專業啲嘅稱呼,叫做二次創作好唔好?」

  大哥,唔好用個創字啦,「二次噁作」是可以接受,因為那班網民當人家隻Peppa豬無阿媽(指原創人)咁樣,將肉麻、惡心,甚至成人之內容,改入Peppa豬之原創動漫之上,變成「擁有中國惡搞特色」嘅不知所謂東西,仲要嘭嘭聲席捲全國,作為父母官實行取締,情有可原,不過,有人竟然將網上自由、言論扯上事件之上,於是中國就好似犯咗太歲,背多一隻黑暗封閉之黑鑊。你傳我傳之下,國際社會竟然認為中國連一隻豬都唔放過,依家仲衰過大清帝國。

  「係囉,你唔知內地都取締維尼熊咩?係咪隻Peppa豬太過神似維尼熊,於是一齊無運行呀?」多餘,我話中國尊重大英帝國知識產權,防止國人整醜樣佢隻Peppa豬又得唔得?長話短說,《啥是佩奇》推出,觸發十幾億瀏覽量,有關當局不但無禁,而且讚拍得好、拍得有中國溫情,如此這般,中國間接同Peppa豬大賣廣告,等如兜巴摑醒嗰班凡是派,仲有摑埋話Peppa豬似維尼熊嗰班大喊十。「安仔,乜內地仲有凡是派?」梗係有,凡有嘢唔見咗,就話同自由有關之人,就是當今凡是派。

  《啥是佩奇》是講農村有個爺爺春節前打電話同孫仔傾偈,問佢想要乜嘢新年禮物,孫仔話要佩奇(內地Peppa豬中譯),爺爺點知邊個係佩奇,佩奇係條鐵定係隻豬,真係考起老人家……終於幾經擺烏龍、錯摸之後,爺爺先知道佩奇係英國原創國寶,大城市周街都有粉紅豬公仔賣,不過,爺爺別出心裁,真係搵咗條鐵出嚟,當Peppa豬送畀個孫仔……

  詳情自己上網睇,究竟條鐵點解變咗Peppa豬,我想講,內地其實不知幾Like健康之動漫人物,最衰就係一班又無創意又無知識產權觀念之人作怪,搞死人家就賴話同維尼熊相似有關,如果維尼熊真係有問題,咁神似之Peppa豬又點會出到嚟跟十幾億中國人過新年?

  「安仔,講番二次創作,即係你口中之惡搞,喺香港係一件光榮之事,合情合法合理,好多人靠佢發達。」大師兄話︰「你話嗰班惡搞搞到上市之大亨之年輕人?」大師兄,你唔好咁心急,聽埋先至下定論。「佢就唔算係年輕人啦,三十年前就係,至於有無公司上市,我無資料,不過真係大亨呢嘅。」哦,你講係周星馳。

  無錯,周星馳把惡搞昇華到周星馳文化境界,創作之中,其實好多兒童不宜,不過星爺太有才華,所以成為全國偶像中之偶像,班後生仔學星爺皮毛,搞來搞去,搞到滿天神佛,你仲話唔係畀香港人累死?

  望一望,着Peppa豬T恤之洋人已溜走,於是大家愈講愈大聲。