(星島日報報道)張繼聰(阿聰)和周秀娜(娜姐)近期因合作演出恐怖喜劇《女皇撞到正》而擦出火花,娜姐呻望住阿聰演對手戲成日都會NG,阿聰戲中角色要不停被鬼上身,因此事前要做足功課模仿不同台詞,還大爆拍野外戲的靈異經歷。

  娜姐、阿聰攜手演出新戲,由於今次電影屬於恐怖戲劇,娜姐笑言初時收到邀請演出時不想接拍,因為本身好驚慄題材,但睇完劇本發現並非完全驚慄,反而溫馨又搞笑,她說:「對住阿聰成日都會NG!有時拍到好需要情緒的時候,比較嚴肅深情,我不可以望住佢。不過跟阿聰合作好開心,拍攝前會做足溝通。」娜姐透露有一場與阿聰、葛民輝的對手戲,兩人不停爆肚,更笑謂他們非常有表演欲,當時自己要打醒十二分精神演出。

  阿聰表示戲中的角色陰氣重、容易被鬼上身,事前要做足功課,因為每次演出被鬼上身時就要扮番那一位靈體,他說:「有場戲臨時演員上我身,於是我叫佢講一次我要講的台詞,然後我觀察佢究竟係點樣的人。其中一日講述幾個鬼魂輪流上我身,所以我當日好謙卑,因為我去求啲演員可唔可以做一次畀我睇。」談到靈異經歷,阿聰坦言不會太驚,有時拍戲會到荒山野嶺取景拍攝,都試過感覺到,他說:「我唔係見到,只係感覺到,但覺得做人問心無愧,好似收音機一樣,較去那個台或不覺意較到個台,就會感覺到。」